Deputeti i PDK-së, Mërgim Lushtaku, në emisionin “Ditari” në Tëvë1, ka komentuar takimet ndërmjet Bedri Hamzës dhe kryeministrit Albin Kurti lidhur me gjetjen e një zgjidhjeje për postin e presidentit.
Lushtaku u shpreh kritik ndaj pjesëmarrjes së Hamzës në këto takime, duke thënë se që në fillim nuk e kishte konsideruar të arsyeshme një hap të tillë.
“Që nga fillimi kam menduar se nuk është dashur fare që z. Bedri Hamza të shkojë në takim, sepse e kam ditur që po tallet me spektrin politik dhe me partitë politike. Ai nuk e kishte qëllimin për të zgjedhur presidentin apo për të dhënë mundësi për një kompromis politik, por për zvarritje të situatës,” ka deklaruar Lushtaku.
Sipas tij, kjo qasje synon që Kurti të paraqitet si viktimë dhe të përfitojë politikisht në një fazë të mëvonshme.
“Qëllimi është që në fund të dalë si viktimë e kësaj situate dhe të mundohet të dalë fitimtar edhe në një rund tjetër. Por qytetarët, kur i japin dikujt mbi 50 për qind të votave, ajo është përgjegjësi e madhe për të udhëhequr vendin dhe jo për t’u tallur me besimin e tyre,” ka shtuar ai.
Lushtaku theksoi gjithashtu se kompromisi politik është i domosdoshëm, edhe kur bëhet fjalë për pozita formale si ajo e presidentit.
“Duhet të merren përgjegjësitë dhe ndonjëherë të pranohet edhe një pozitë formale si ajo e presidentit në kuadër të një kompromisi politik, e jo të shkohet me premtime që janë dhënë para fushatës,” ka thënë ai.
Në fund, deputeti i PDK-së akuzoi kryeministrin Kurti se nuk është i interesuar për tejkalimin e situatës aktuale.
“Kurti nuk po do ta tejkalojë vetë këtë situatë, për të i duhen zgjedhjet sepse nuk ngopet me pushtet,” ka përfunduar Lushtaku.
