Deputetja e Lidhjes Demokratike të Kosovës, Jehona Lushaku-Sadriu, ka reaguar ndaj ngërçit të zgjatur institucional, duke e cilësuar situatën si një kosto të lartë për qytetarët dhe një cenim të drejtpërdrejtë të demokracisë.
“Kjo është një kosto tepër e lartë për qytetarët e Kosovës për funksionimin tonë si demokraci dhe që e cenon demokracinë tonë,” u shpreh ajo, duke akuzuar partinë në pushtet se po e vonon qëllimisht zgjidhjen për të ruajtur kontrollin mbi ekzekutivin.
Sipas saj, mungesa e urgjencës për tejkalimin e krizës tregon qartë qëllimin final të partisë së parë që, sipas saj, është të mos e lëshojë pushtetin. “Ata po arrijnë që të marrin vendime antikushtetuse dhe antiligjore,” shtoi Lushaku-Sadriu.
Në të njëjtën kohë, ajo bëri të ditur se nesër LDK-ja do të prezantojë një plan prej 15 pikash për një qeveri gjithëpërfshirëse.
“Ky plan do të përmbajë propozime konkrete për tejkalimin e krizës aktuale dhe kthimin e vendit në normalitet institucional”, tha ajo./teve1.info/
