Shefja e grupit parlamentar të LDK-së, Jehona Lushaku ka kërkuar nga ministria e industrisë që të mos ndërrohen njehsorët elektrik, në mënyrëqë të mbesin si prova për hetuesinë dhe t’u kthehen paratë cent më cent qytetarëve.
Gjatë seancës së Kuvendit, Lushaku tha se po vazhdon të vidhet energjia elektrike nga vet shteti.
“Rreth 87 përqind të shtëpive tona është duke u vjedhur energjia elektrike dhe nga kush nga vet shteti, në sy të shtetit, për mungesë dhe neglizhencë të kësaj qeverie për t’i kontrolluar dhe konstatuar që njehsorët tonë nuk janë duke matur shpenzimin e energjisë elektrike në mënyrë të duhur dhe të saktë. Dhe kjo i bie që në sy të shtetit dhe mungesë të vëmendjes nga qeveria ne tash e gjashtë vite jemi të vjedhur. Ministria përgjegjëse e energjisë dhe industrisë nuk ka siguruar që këto matje të bëhen të sakta dhe për këtë kemi kërkuar përgjegjësi”, tha Lushaku.
Lushaku kërkoi të mos ndërrohen njehsorët në mënyrë që të konstatohet kjo vjedhje.
“Kjo është e papranueshme përderisa prokuroria ka filluar hetimet sepse kjo është një ndër skandalet më të mëdha në koston dhe kurrizin e secilit qytetarë. Kërkojmë edhe njëherë që qeveria të mos e lejoj ndryshimin e njehsorëve nëpër shtëpi, për ta fshehur vjedhjen. Të sigurohet që njehsorët mbesin aty si prova për hetuesinë të konstatohet kjo vjedhje dhe paratë të kthehen cent më cent qytetarëve”, tha ajo.
