Rritja e nivelit të ujit ka bërë që lumi Vjosa të dalë nga shtrati, duke paraqitur rrezik serioz për zonën e Novoselës si dhe për fshatin Ferras në Fier.
Autoritetet kanë bërë thirrje për evakuim të menjëhershëm të banorëve të Njësisë Administrative Novoselë, për shkak të përmbytjeve dhe rrezikut të drejtpërdrejtë për jetën dhe shëndetin e qytetarëve.
Procesi i evakuimit do të zhvillohet në bashkëpunim me Agjencinë Kombëtare të Mbrojtjes Civile (AKMC), Prefektin e Qarkut dhe strukturat e emergjencave civile në nivel bashkie.
Në këtë proces do t’u jepet përparësi fëmijëve, të moshuarve, personave me aftësi të kufizuara si dhe familjeve që ndodhen në zona të izoluara.
Strehimi i personave të evakuuar do të menaxhohet nga Bashkia në koordinim me Policinë e Shtetit, strukturat shëndetësore dhe shërbimet sociale, sipas RTSH.
Në qendrat e strehimit të përkohshëm do të kryhet regjistrimi i banorëve, do të sigurohen nevojat bazë si ushqimi, veshmbathja dhe ndihma mjekësore, si dhe do të ofrohet informacion i vazhdueshëm mbi zhvillimin e situatës dhe hapat e mëtejshëm që do të ndërmerren.
