Grup kurd që ka zhvilluar një kryengritje të gjatë në Turqi ka njoftuar të enjten se luftëtarët e tij në Irakun verior do të fillojnë të dorëzojnë armët e tyre, duke shënuar hapin e parë konkret drejt çarmatimit si pjesë e një procesi paqeje, ka raportuar AP.
Partia e Punëtorëve të Kurdistanit , ose PKK, njoftoi në maj se do të shpërbëhej dhe do të hiqte dorë nga konflikti i armatosur , duke i dhënë fund katër dekadave armiqësi.
Ky veprim erdhi pasi udhëheqësi i PKK-së, Abdullah Öcalan , i cili është burgosur në një ishull pranë Stambollit që nga viti 1999, i kërkoi grupit të tij në shkurt të mblidhte një kongres dhe të shpërbëhej e çarmatosej zyrtarisht.
76-vjeçari Öcalan vazhdon të ushtrojë ndikim të rëndësishëm në lëvizjen kurde pavarësisht 25 viteve burgim.
Thirrja e tij për t’i dhënë fund luftimeve shënoi një hap të rëndësishëm drejt përfundimit të konfliktit dekadash të gjatë që ka marrë dhjetëra mijëra jetë që nga vitet 1980.
Ceremonia, e cila pritet të zhvillohet midis 10 dhe 12 korrikut në qytetin Sulaymaniyah në rajonin gjysmë-autonom kurd të Irakut verior, do të jetë hapi i parë konkret drejt çarmatimit.
