Analisti shqiptar Fatos Lubonja ka komentuar marrëdhëniet mes Kosovës dhe Shteteve të Bashkuara të Amerikës, duke i cilësuar ato si komplekse dhe jo gjithmonë të kuptuara siç duhet nga udhëheqësit politikë në Prishtinë. Këto komente ai i bëri në emisionin “Mesditë” në Tëvë1.
Sipas tij, në Kosovë ekziston një qasje naive ndaj politikës amerikane, pasi çdo parti që vjen në pushtet mendon se përfaqëson të gjithë spektrin politik dhe se ka përkrahje të pakushtëzuar nga SHBA-ja.
“Në Kosovë, çdo parti që vjen në pushtet mendon se përfaqëson gjithë spektrin politik dhe, njëkohësisht, sikur Amerika është një dhe e pandryshueshme. Kjo është një lloj qëndrimi naiv, sepse gjërat janë shumë më komplekse. Varet se çfarë qëndrimesh ka Trump-i, çfarë projekte kishte Biden, dhe çfarë projekte kanë SHBA-ja e Evropa sot,” u shpreh Lubonja.
Ai theksoi se presidentja Vjosa Osmani shihet si më e afërt me qarqet republikane në SHBA, ndërsa kryeministri Albin Kurti po përballet me sfida në raportet ndërkombëtare.
“Unë shoh që në Kosovë, Vjosa Osmani është shumë më afër rrethit të Trump-it, ose administratës së tij. Kurse Kurti ka probleme – dhe ndalimi i saj nga SHBA mund të lidhet me këto tensione. Problemet kanë të bëjnë me vizione të ndryshme, sidomos për marrëdhënien me Serbinë, rrezikun nga Serbia, dhe mënyrën se si Kurti po tenton të vendosë rend dhe ligj në pjesën veriore të Kosovës,” tha ai.
Lubonja vuri në dukje se megjithëse e kupton rrezikun e autoritarizmit nga ana e Kurtit, ai thekson se nuk po sheh vullnet për dialog të brendshëm politik në Kosovë.
“E kuptoj shumë mirë rrezikun e autoritarizmit që mund të vijë nga Kurti, i cili duhet të hapet dhe të kërkojë zgjidhje – jo të imponojë zgjidhje. Por gjithsesi, nuk e shoh dëshirën për të hapur një dialog të sinqertë, për të ndarë mendimet dhe për të rënë dakord për disa gjëra, e për disa jo. Sepse kemi vizione të ndryshme, qoftë në raport me administratën Trump, qoftë me administrata të tjera,” shtoi Lubonja.
Në përfundim, ai theksoi se problemet politike në Kosovë nuk lidhen vetëm me Kurtin apo Osmanin, por me mungesën e një kulture politike bashkëpunuese ndërmjet partive.
“Mungesa e komunikimit mes partive politike në Kosovë për çështje kaq të rëndësishme për të ardhmen e vendit është më e thellë sesa problemet e një individi si Kurti apo Osmani,” përfundoi ai.
