Asnjëra parti politike nuk i ka numrat e nevojshëm për ta formuar qeverinë e re në Kosovë.
Partia fituese e zgjedhjeve Lëvizja Vetëvendosje, po këmbëngul se do të qeverisë e vetme ndërsa ne mesin e partive opozitare veçse kanë filluar diskutimet joformale për koalicione.
Për ta formuar shumicën duhen së paku 61 deputetë nga 120 ulëse në Kuvendin e Kosovës.
Analisti politik, Agon Maliqi, thotë se është krejtësisht legjitime dhe demokratike që opozita ta formojë qeverinë në rast se Vetëvendosja nuk i siguron numrat e nevojshëm për ta krijuar shumicën.
“Me sistemin tonë demokratik parlamentar është legjitime ta bëj qeverinë kushdo që e formon shumicën. Pra, i pari e ka mundësinë ta krijoj qeverinë por sistemi ynë politikë imponon konsensus. Mandati i kaluar ka qenë përjashtim nga ky rregull për shkak të rezultatit zgjedhor. Nëse VV me 48 deputetë është e paaftë për ta formuar qeverinë atëherë kjo mundësi i takon partive opozitare”, thotë Maliqi.
E për shkak të rezultatit zgjedhor, publicisti Fatos Lubonja, vlerëson se Vetëvendosje duhet të qëndrojë në pushtet megjithëse sipas tij Kurti duhet të jetë shumë më i hapur për bashkëpunim me partitë e tjera opozitare.
Lubonja thotë se Kosova duhet të ketë shumë kujdes nga zhvillimet gjeopolitike andaj ai konsideron që partitë politike në vend të jenë sa më të unifikuara.
“Kosova është në një situatë mjaft problematike duke i parë zhvillimet gjeopolitike. Mendoj se Vetëvendosje dhe partitë opozitare duhet ta bëjnë maksimumin për ta gjetur gjuhën e përbashkët. Në këto rrethana politike duhet të ketë gatishmëri për kompromise politike mes partive ne emër të interesave të Kosovës. Megjithatë duhet thënë se janë të rralla rastet kur shqiptarët kanë bashkëpunuar për të mirën e përbashkët”, thotë Lubonja për Tëvë1.
Partitë opozitare, PDK, LDK dhe AAK kanë refuzuar një koalicion të mundshëm me Lëvizjen Vetëvendosje, ndërsa lideri Nismës Socialdemokrate, Fatmir Limaj, ka deklaruar se nuk ka vija të kuqe me asnjë parti.
