Filmi i shkurtër Two People Exchanging Saliva, ku luan aktorja me origjinë nga Kosova Luana Bajrami, është nderuar me çmimin për Filmin më të Mirë të Shkurtër me Aktorë në ceremoninë prestigjioze të Academy Awards.
Në këtë projekt filmik, Bajrami interpreton rolin kryesor në një histori të vendosur në një Paris të pazakontë, ku puthjet janë të ndaluara me ligj. Filmi paraqet një realitet absurd dhe të ftohtë, ku personazhet përballen me rregulla të çuditshme dhe kufizime të pazakonta shoqërore.
Fitorja e këtij çmimi e sjell edhe më shumë në vëmendje ndërkombëtare emrin e aktores shqiptare, duke e vendosur atë në skenën më të madhe të kinematografisë botërore.
Bajrami, me origjinë nga fshati Pleshinë i Ferizajt, emigroi në Francë në moshën shtatëvjeçare. E lindur më 14 mars 2001, ajo është bërë e njohur për rolet e saj në filmat Portrait of a Lady on Fire (2019) dhe School’s Out (2018).
Në vitin 2021, ajo bëri debutimin edhe si regjisore me filmin The Hill Where Lionesses Roar, i cili pati premierën në Cannes Film Festival dhe më pas u vlerësua me çmime në disa festivale ndërkombëtare, përfshirë Calgary International Film Festival dhe Raindance Film Festival.
