Mesfushori i Kosovës Lorik Emini është pezulluar për dy ndeshje pas ndërhyrjes së tij si “mbrojtësi i fundit” në fitoren 2:1 të FC Rapperswil-Jona kundër Aaraut, por klubi zviceran nuk është pajtuar me vendimin dhe ka dorëzuar ankesë zyrtare me shpresën për ta ulur dënimin.
Sipas të përditshmes zvicerane “Blick”, pezullimi i parë i Eminit pas kartonit të kuq është automatik, që do të thotë se 26-vjeçari do të mungojë të paktën në ndeshjen e radhës kundër FC Wil, e vlefshme për javën e 13-të të ‘dieci Challenge League’.
Megjithatë, FC Rapperswil-Jona ka bërë ankesë kundër vendimit të Komisionit Disiplinor, duke kërkuar që pezullimi të reduktohet në vetëm një ndeshje. Vetë lojtari shpreson që komisioni të marrë parasysh rrethanat e ndërhyrjes, që ai e konsideron më shumë si ndërhyrje taktike sesa të qëllimshme.
Lorik Emini iu bashkua Rapperswil-Jonas këtë verë, pasi më parë ishte pjesë e FC Vaduz, ndërsa karrierën e tij e nisi në akademinë e FC Luzern, ku zhvilloi 61 ndeshje në Superligën zvicerane. Lojtari me origjinë shqiptare nga Kosova ka fituar përvojë të konsiderueshme në futbollin elitar zviceran dhe shihet si një nga shtyllat kryesore të skuadrës së sapo ngjitur në Challenge League.
Vendimi përfundimtar mbi apelimin e klubit pritet të merret në ditët në vijim.
