Loriana Kuka e ka fituar të shtunën medaljen e parë në kategorinë e re të saj, atë deri 70 kilogramë. Xhudistja kosovare fitoi medaljen e bronztë në garën Grand Prix që po mbahet në Dushanbe të Taxhikistanit.
Për Lorianën është gara e dytë në kategorinë deri 70 kilogramë. Ajo prej fillimit të vitit 2018 ka bërë karrierë vetëm në kategorinë deri 78 kg. Por së fundi kishte telashe me formë dhe vendosi të zhvendoset një kategori më poshtë. Në 70 kilogramë ka garuar te të rejat, pra në fillim të karrierës.
Për medalje të bronztë, Loriana fitoi pa luftë. Britanikja Katie-Jemima Yeats-Brown nuk doli në tatami për shkak të një lëndimi.
Loriana e nisi ditën me fitore ndaj irlandezes Rachael Hawkes. Më pas humbi nga bartësja e parë, britanikja Kelly Petersen Pollard. Lufta ndaj saj ishte e barabartë, por Loriana mbeti pa forcë dhe pësoi dënimin e tretë. Në luftën e parë të repesazhit, xhudistja kosovare e mposhti Shokhista Nazarovan e Uzbekistanit.
Një javë më herët në Grand Prix në Upper të Austrisë, Loriana u rendit e pesta. Në Dushanbe fitoi të bronztën, ndërsa garë tjetër do të ketë në Kazakistani, dy javë më vonë. Atje mbahet garë e nivelit Grand Slam.
Loriana ka medalje botërore e evropiane në 78 kilogramë. Tani po testohet në kategorinë deri 70 kg dhe nëse i ec mirë, atëherë normën olimpike pritet ta kërkojë në këtë kategori.
Me vendin e tretë në Grand Prix, Loriana ka fituar 350 pikë për renditjen botërore.
Në Taxhikistan të shtunën garoi edhe Akil Gjakova. Edhe Akili, njëjtë si Loriana, është në kërkim të formës më të mirë dhe normës olimpike. Në kategorinë deri 73 kg, Akili nisi me dy fitore. Mposhti rumunin Alexandru Raicu dhe mongolin Usukhjargal Altaibaatar. Në çerekfinale u ndal nga Makhmadbek Makhmadbekov, që garoi si i pavarur. Ai është nga Rusia. Makhamadbekov në fund fitoi medaljen e artë. Në repesazh, Akili mbeti pa forcë dhe pësoi nga francezi i papërshtatshëm, Benjamin Axus. Axus në fund fitoi të bronztën, ndërsa Akil Gjakova u rendit i shtati. Fitoi 182 pikë në ranglistën botërore.
Trajneri Driton Kuka ka dërguar vetëm këta dy xhudistë në Taxhikistan. Me ta ishte ndihmës-trajneri Fatos Tabaku.
