Janë vetëm dy javë deri në fillimin e vitit të ri shkollor 2025/26 në arsimin parauniversitar.
E përgatitjet Ministria e Arsimit, Shkencës, Teknologjisë dhe Inovacionit veçse i ka filluar.
Që nga dita e premte, prindërit kanë mundësi të aplikojnë për subvencionimin e teksteve shkollore dhe materialeve mësimore përmes platformës e-Kosova.
Kjo metodë po futet në vitin e tretë që po përdoret.
Por këtë mënyrë Sindikata e Bashkuar e Arsimit, Shkencës dhe Kulturës nuk e sheh si të duhur.
Pasi sipas tyre, pajisja me tekste po vonohet.
“Mendoj se kjo mënyra e subvencionimit të teksteve shkollore nuk është e mirë, për arsyeje se nxënësit që ditën e parë po ndoshta me muaj po shkon dhe nuk po pajisen me tekste dhe mjete mësimore. Ndërsa vite më herët kur shkollat u furnizonin me libra dhe që në ditën e parë mësimdhënësit u’a shpërndanin nxënësve librat dhe menjëherë ditën e parë ata ishin të pajisur me tekstet shkollore”, tha Vjollca Shala nga SBAShK.
Mirëpo, njohësi i arsimit, Rinor Qehaja, thotë se problemi qëndron tek hapja me vonesë e platformës E-Kosova për subvencionimin për tekste shkollore.
“Ajo çka është me rëndësi dhe që e kom përshtypjen rikthehemi në të njëjtin çdo herë si problem në vete është hapja me vonesë të e platformës së E-Kosovës për subvencionim për tekste shkollore. Pra unë vlerësoj që dy javë para shtatorit do të duhej të ishin të mjaftueshme por prapë janë të pakta kur dihet numri i madh i nxënësve në nivel vendi”, tha Qehaja.
E libraritë vetëm se kanë filluar me furnizim.
Një ndër to është edhe libraria Altera, se cila u shpreh se këtë vit gjendja është më mirë pasi nuk ka mungesa të librave shkollor.
“Tani është vitit i tret i Librarisë Altera që bënë shitjen e teksteve shkollore nga klasa e parë deri në klasën e nëntë që subvencionohet dhe tekstet e tjera të shkollave të mesme. Këtë vit jemi shumë ma mirë se vitet e kaluara për arsyeje se librat i kemi në dispozicion, jemi furnizuar nga të gjitha shtëpitë botuese andaj nga sot e tutje të gjitha tekstet shkollore i kemi në raftet shitëse”, tha drejtori regjional i Alterës, Elez Morina.
Procesi i aplikimit këtë vit nga MASHT-i po shihet të jetë shumë më i lehtë, pasi llogaritë bankare të prindërve janë aktive nga vitet paraprake.
Ndërsa sa i përket tekstet shkollore për nivelin VI-IX , MASHTi ka njoftuar se sipas Udhëzimit Administrativ Nr. 13/2016 për pajisjen, përdorimin dhe ruajtjen e tyre, do të përdoren nga gjenerata e kaluar.
Kronikë e realizuar nga gazetarja, Adea Mustafaj.
