Skuadrës së Suharekës i kanë mjaftuar vetëm 45 minuta për të krijuar epërsi të thellë ndaj Llapit, në ndeshjen e fundit të xhiros së 16-t të Superligës së Kosovës në futboll.
Pas pjesës së parë, Suhareka po avancon me rezultatin 3:0 dhe është në rrugë të mirë për t’u kthyer tek fitorja pas pesë xhirove.
Mevlan Zeka (15’) nga penalltia, Arvanit Rexhaj (17’) dhe Eneid Kodra (22’) shënuan golat për Suharekën që kanë dominuar në çdo aspekt ndaj Llapit në pjesën e parë.
Suhareka, aktualisht është e pesta në Superligë me 19 pikë dhe ndaj Llapit është futur pas një serie prej tri barazimeve dhe dy humbjeve në pesë ndeshjet e fundit.
Në anën tjetër, Llapi po e konfirmon krizën e thellë që po e kalon pasi në nëntë ndeshjet e fundit, përfshirë edhe këtë ndaj Suharekës nuk di për fitore dhe renditet i shtati në tabelë me 17 pikë.
