Ndeshja e vetme e zhvilluar në Superligën e Kosovës në futboll këtë vikend i ka takuar Llapit. Skuadra e Tahir Batatinës, arriti fitore me rezultat të pastërt 0-2 në udhëtim përballë Gjilanit.
Në një ndeshje të luftuar në stadiumin me bari sintetik në Gjilan, pjesa e parë përfundoi pa gola, duke u zhvilluar kryesisht në mesin e fushës.
Edhe e dyta filloi me intensitet të njejtë, pasi të dyja skuadrat kërkonin që të shënonin. Megjithatë, u desh të pritej minuta e 82’ dhe Ahmed Jonuzi si si zëvendësues dha një top të mirë për Valmir Veliun i cili zhbllokoi takimin.
Ishte pikërisht Jonuzi ai që bëri asistuesin edhe në minutën e 90’, ndërsa shënues në këtë rast ishte sulmuesi Muhamet Hyseni, i cili gjeti rrjetën për herë të 10 këtë sezon.
Llapi me këtë fitore ngjitet në kuotën e 28 pikëve dhe është në pozitën e dytë, me tri pikë më shumë se Drita që është një vend më poshtë por që ka dy ndeshje më pak.
Ndërkaq Gjilani mbetet në pozitën e 7 dhe pas 14 ndeshjeve numëron poaq pikë, 2 më shumë se Feronikeli në vendin e 8. Ndeshjet e tjera janë shtyrë për shkak të reshjeve të borës dhe pritet të zhvillohen gjatë javës së ardhshme.
