Kryetari i Drenasit, Ramiz Lladrovci ka përkujtuar dëshmorët, Fehmi e Xhevë Lladrovcin në 27 vjetorin e rënies së tyre.
Lladrovci është shprehur se ata me përkushtimin e pathyeshëm atdhetar kanë treguar se cila ishte rruga e lirisë, rruga e fitores dhe rruga e nderit.
“27 vjet dhimbje e krenari, Feha e Xheva, bashkë në jetë, bashkë në përjetësi. Ata na udhëzuan se cila ishte rruga e lirisë, rruga e fitores, rruga e nderit me përkushtimin e pathyeshëm atdhetar. Vitet, dekadat dhe shekujt do të rrjedhin, ndërsa liria jonë do të matet me flijimin epik që ia dhuruan kombit. Idealet e tyre jetësohen me punë të ndershme, fuqizimin e shtetit e barazi para ligjit”, ka shkruar Lladrovci në Facebook.
Ai tutje ka përkujtuar edhe Fatime Hetemin, Shefqet Zekën, Behxhet Karaxhën, Milazim Karaxhën dhe Hamit Lladrovcin të cilët, bashkë Fehmin dhe Xhevën, ranë heroikisht gjatë luftimeve më 22 shtator të vitit 1998 në malet e Qyqavicës.
“Më 22 shtator 1998, me Fehën dhe Xhevën, rrugën e përjetësisë e morën Fatimja, Shefqeti, Behxheti, Milazimi dhe Hamiti Lavdi Ushtrisë Çlirimtare të Kosovës! Lavdi jetës dhe veprës heroike të Fehmi e Xhevë Lladrovcit, Fatime Hetemit, Shefqet Zekës, Behxhet Karaxhës, Milazim Karaxhës dhe Hamit Lladrovcit!
Lavdi dëshmorëve dhe martirëve të kombit”, ka shtuar ai.
