Kryetari i Komunës së Drenasit, Ramiz Lladrovci, ka apeluar te qytetarët që të respektojnë udhëzimet dhe sinjalistikën e vendosur për ndalimin e qarkullimit në disa akse rrugore, pas situatës së krijuar nga vërshimet e fundit.
Përmes një njoftimi publik, Lladrovci ka paralajmëruar se qarkullimi mbi të ashtuquajturën “Ura e Senikëve”, në aksin që lidh fshatrat Korroticë e Poshtme dhe Shtrubullovë, paraqet rrezik serioz për shkak të dëmtimit të bazës së urës dhe gërryerjes së rrugës nga ujërat.
Sipas tij, kjo urë aktualisht nuk është e sigurt për përdorim dhe çdo kalim përmes saj mund të rrezikojë jetën dhe sigurinë e qytetarëve.
Kryetari i Drenasit ka bërë të ditur se qytetarët duhet të shfrytëzojnë rrugën alternative në drejtim të Llapushnikut, përmes Krajkovës, Damanekut, Baicës dhe Çikatovës së Re.
Ai ka theksuar se mosrespektimi i sinjalistikës dhe udhëzimeve do të mbetet përgjegjësi personale e qytetarëve, duke shtuar se Policia e Kosovës nuk ka mundësi të jetë e pranishme në çdo pikë të ndalimit.
Autoritetet komunale u bëjnë thirrje qytetarëve që të tregojnë kujdes të shtuar dhe të kontribuojnë në ruajtjen e sigurisë derisa të tejkalohet situata e krijuar nga vërshimet.
