Kryetari i Komunës së Drenasit, Ramiz Lladrovci, gjatë qëndrimit në Londër ka zhvilluar një takim me deputetin britanik Martin Vickers, anëtar i Grupit Ndërpartiak të Miqësisë Britani–Kosovë dhe Shqipëri, me të cilin ka diskutuar për thellimin e bashkëpunimit lokal në fusha të ndryshme.
Në fokus të takimit ishin kultura, sporti, ekonomia, si dhe mundësitë për binjakëzim të komunave të Kosovës me ato britanike, me synim përafrimin e vlerave dhe interesave të përbashkëta ndërmjet dy vendeve.
Lladrovci ka bërë të ditur se me Vickersin kanë diskutuar edhe për çështje që lidhen me pushtetin lokal, arritjet dhe sfidat, si dhe për aktualitetin politik në Kosovë dhe rajon.
Ai ka vlerësuar deputetin britanik si një mik të madh të Kosovës, duke theksuar se Vickers ndjek nga afër zhvillimet në Ballkan dhe është një zë i qartë në mbështetje të zgjidhjeve që lidhen me të ardhmen euro-atlantike të rajonit.
Pas takimit zyrtar në Dhomën e Përfaqësuesve, Lladrovci ka bërë të ditur se kanë pasur edhe një darkë familjare, gjatë së cilës janë diskutuar tema të tjera, përfshirë sportin dhe sukseset e të rinjve kosovarë në fusha të ndryshme.
Në fund, Lladrovci ka falënderuar deputetin Martin Vickers për pritjen dhe mbështetjen e vazhdueshme ndaj Kosovës, duke e cilësuar miqësinë e tij si një vlerë të rëndësishme për shtetin dhe qytetarët e Kosovës.
