Skuadra e Liverpoolit, ka lëshuar njoftimin e parë për vdekjen e yllit të kësaj skuadre, Diogo Jota.
Portugezi 28-vjeçar vdiq në një aksident komunikacioni në Spanjë. Në këtë aksident, ka vdekur edhe vëllai i Jotas, po ashtu futbollist.
“Klubi është informuar se 28-vjeçari ka ndërruar jetë pas një aksidenti rrugor në Spanjë, së bashku me vëllain e tij, Andre. Liverpooli nuk do të bëjë asnjë koment të mëtejmë në këtë kohë dhe kërkon që privatësia e familjes, miqve, bashkëlojtarëve dhe stafit të Diogos dhe Andre të respektohet, ndërsa ata përpiqen të përballojnë një humbje të paimagjinueshme. Ne do të vazhdojmë t’ua ofrojmë atyre mbështetjen e plotë”, shkruan në njoftimin e Liverpoolit.
Reagim pati edhe nga Federata e Futbollit të Portugalisë, që ka shprehur ngushëllime për vdekjen e Diogo Jotas dhe vëllait të tij, Andre Silva.
“Shumë më tepër se vetëm një lojtar fantastik, me pothuajse 50 ndeshje me Portugalinë, Diogo Jota ishte një person i jashtëzakonshëm, i respektuar nga të gjithë shokët e ekipit dhe kundërshtarët. Në emrin tim dhe në emër të federatës portugeze të futbollit, shpreh ngushëllimet më të thella për familjen dhe miqtë e Diogos dhe Andore Jotas, si dhe për Liverpoolin dhe Penafielin, klubet ku luajtën dy lojtarët. Kemi humbur dy kampionë. Vdekja e Diogo dhe Andre Silvas është humbje e pariparueshme për futbollin portugeze dhe ne do të bëjmë çdo gjë të mundur për të nderuar trashëgimin e tyre”, shkruan në letrën e presidentit të federatës portugeze, Pedro Proença.
