Liverpooli është gati të bëjë çmenduri për t’u përforcuar në sulm. Dhe duket se ka përgatitur një ofertë prej 175 milionë eurosh (150 milionë sterlina), për sulmuesin e Newcastle United, Alexander Isak.
Konkretisht, sipas asaj që ka përcjellë gazetari anglez Craig Hopp, kampionët e Anglisë duket se duan të bëjnë më në fund realitet atë që ka qenë objektivi kryesor për sulmin gjatë kësaj vere. Kështu që “Reds” do të duhet të shpenzojnë jo pak për të konkretizuar gjithçka. Trajneri Arne Slot është i vendosur të forcojë skuadrën e tij, pasi synon të mbrojë titullin e kampionit edhe në sezonin e ardhshëm.
Skuadra nga “Anfield” deri tani ka realizuar me sukses afrimet si Frimpong, Wirtz dhe Kerkez. Mirëpo, tani ende po kërkojnë të shtojnë një qendërsulmues. Ndërsa duket se veç Isakut, po vlerësojnë edhe Ekitiken të Eintrachtit.
Nga ana tjetër, “Laraskat e Zeza”nuk e kanë ndërmend ta shesin sulmuesin kryesor Isak, përjashto ndonjë ofertë marramendëse. “Magpies” do t’i ofrojnë atij fanellën me numër 9 në një përpjekje për ta bindur atë të qëndrojë në “St James’ Park”.
Sulmuesi 24-vjeçar nga Suedia mund të thuhet se ka qenë një nga sulmuesit më të fortë në Premier League sezonin e kaluar. Ai i shënoi 27 gola dhe pati 6 asistime në 42 ndeshje në të gjitha garat. Gjithashtu, për t’u veçuar është se Isak shënoi ndaj Liverpoolit në finalen e “Carabao Cup”, duke i dhënë fund pritjes së Newcastlet për trofe.
