Kjo parti ka bërë të ditur se nga kjo gjuajtje me armë, ka mbetur i plagosur rëndë një qytetar serb.
“Forcat speciale të Kurtit shpërthejnë zjarr ndaj serbëve në një pikë ilegale në urën pranë lumit Bistrica, në të cilën mbeti i plagosur rëndë Miljan Deleviq, është një pikë që ka dalë nga xhami pas një sërë sulmesh ndaj serbëve që nga viti i ri këtu”, thuhet në njoftim.
Tutje Lista Serbe ka shkruar se në automjet kishte dy serbë “ndërsa qëllimi i policisë ishte për t’i vrarë ata”.
Lista Serbe ka kërkuar që ”të tërhiqen të gjitha njësitë speciale nga veriu i vendit”.
“Lista Serbe kërkon tërheqjen e menjëhershme të të gjitha forcave speciale të Kurtit nga veriu i Kosovës dhe Metohisë dhe arrestimin dhe sanksionimin e atyre që tentuan të vrasin Miljan Deleviqin dhe shoqëruesin e tij sot. Edhe një herë theksojmë se prania e mëtejshme e këtyre formacioneve mund të na sjellë në një spirale ngjarjesh që do të rrezikojnë në mënyrë të pakthyeshme paqen në këtë rajon”, thuhet tutje një njoftim.
Ndryshe policia bëri të ditur sot se në tentim për ta ndalur një veturë në Bistricë të Leposaviqit, kishin hasur në rezistencë. Vetura ka goditur njësinë e policisë duke rrezikuar jetën e tyre dhe për ta neutralizuar sulmin, policët kanë qëlluar me armë drejt tyre.
Megjithatë, policia nuk ka konfirmuar nëse nga ky sulm është plagosur dikush.
