Lista Serbe sërish i është drejtuar me ankesë Gjykatës Kushtetuese.
Përmes saj, ata kanë pretenduar se me zgjedhjen e Nenad Rashiq si nënkryetar i Kuvendit nga komuniteti serb, është shkelur Kushtetuta, Rregullorja e punës e Kuvendit dhe një aktgjykim i mëparshëm i Kushtetueses.
Por, a ka bazë ligjore një ankesë e tillë pasi që Kuvendi është shpallur si i konstituuar?
“Unë vlerësoj se ka bazë të mjaftueshme dhe ka bazë të qëndrueshme që kjo çështje të kontestohet në Gjykatë Kushtetuese dhe rrjedhimisht të kërkohet interpretim nëse vërtetë Kuvendi i ka zbatuar si duhet procedurat edhe të parashikuara në Rregullore të Kuvendit, por edhe të përcaktuara tashmë edhe me vendim gjyqësor të vetë Gjykatës Kushtetuese”, deklaroi Vullnet Bugaqku nga KDI.
Madje Bugaqku, vlerëson se kërkesa për caktim të masës së përkohshme ndaj Kuvendit edhe mund të realizohet.
“Nëse Gjykata Kushtetuese vlerëson që aspektin prima facie, preliminar ka elemente të shkeljeve kushtetuese me rastin e zgjedhjes së nënkryetarit të Kuvendit ajo duhet të vendosë domosdo masë të përkohshme për të sanuar që mos të shkaktohet në një situatë kur vetë vendimi i Gjykatës Kushtetuese mund të jetë me shkelje Kushtetuese dhe rrjedhimisht mund të kemi edhe zgjedhje të Qeverisë nëse nuk ka masë të përkohshme atëherë i bie se komplet procedura e konstituimit të Kuvendit konsiderohet jokushtetuese”, tha ai.
Megjithatë, avokati Asdren Bytyqi nuk pret risi. Ai madje vlerëson që Kushtetuesja do ta refuzojë këtë kërkesë si të pabazuar.
“Mendoj që zgjedhja e z.Rashiq është e ligjshme. Ajo çka unë konsideroj që është e rëndësishme për këtë çështje është që Gjykata Kushtetuese në vendim e ka paraparë mundësinë e paraqitjes së një situate të tillë ku Lista Sërpska prapë mund të parashtrojë kërkesë, përkatësisht ankesë pranë Gjykatës Kushtetuese për të vlerësuar ligjshmërinë e zgjedhjes së nënkryetarit nga komuniteti serb, e mendoj që është i absorbuar, i konsumuar brenda vendimit edhe situata e tillë e zgjedhjes së Rashiq”, tha avokati Bytyqi.
Pas seancës së 10 tetorit, Lista Serbe doli me deklarim ku tha se e kundërshtojnë zgjedhjen e Rashiqit nënkryetar dhe se do ta ankimojnë këtë çështje në Kushtetuese.
