Është liruar për qarkullim rruga para Komunës së Leposaviqit, e cila ka qenë deri dje e bllokuar për të gjithë qytetarët.
Kështu ka bërë të ditur Shqipe Latifi, nga kabineti i kryetarit të Leposaviqit, Lulzim Hetemi, përcjell teve1.info
Sipas saj, banorët lokal kanë bërë dje një kërkesë që të lejohet qarkullimi i automjeteve që bartin nxënësit me aftësi të kufizuara, por lirimi për qarkullim është bërë për të gjithë qytetarët.
Teksa në hapjen e rrugës ka asistuar Policia e Kosovës dhe KFOR-i.
“Gjatë ditës së djeshme kemi pranuar një kërkesë nga banorët lokal që të lejojmë qarkullimin e automjeteve që bartin nxënësit me aftësi të kufizuara nëpër rrugën që deri tani ka qenë e bllokuar për qarkullim. Falënderojmë Policinë e Kosovës dhe KFOR-in që ka asistuar në hapjen e rrugës jo vetëm për këtë kategori, por në lirimin për qarkullim për të gjithë qytetarët e Komunës së Leposaviqit”, ka bërë të ditur Latifi.
Teve1.info ka kontaktuar edhe Policinë e Kosovës, por të njëjtit nuk kanë kthyer përgjigje deri në publikimin e artikullit.
Deri në gjysmë të muajit korrik, qytetarët serbë kanë protestuar para objektit të Komunës së Leposaviqit, si dhe në komunat tjera veriore, për të shprehur pakënaqësi për kryetarët shqiptarë të zgjedhur në zgjedhjet e 23 prillit 2023.
