Shtetasi i Kosovës, Bajram Bajrami, është liruar nga autoritetet e Kroacisë pas ndalimit të tij në bazë të një urdhër-arresti ndërkombëtar të lëshuar nga Serbia, ka njoftuar Ministria e Drejtësisë e Kosovës.
Sipas ministrisë, urdhër-arresti lidhej me pretendime për kryerjen e veprave penale të krimeve të luftës, të cilat Serbia ia atribuon Bajramit gjatë kohës kur ai dyshohet se ishte pjesëtar i Ushtrisë Çlirimtare të Kosovës.
Ministria e Drejtësisë ka thënë se institucionet e Kosovës kanë qenë të angazhuara që nga momentet e para të ndalimit.
“Zëvendëskryeministrja dhe Ministrja e Drejtësisë, Donika Gërvalla, ka ndërmarrë veprimet e nevojshme institucionale për adresimin e rastit, me ç’rast më 14 gusht 2026, përmes një shkrese zyrtare drejtuar Ministrit të Drejtësisë të Kroacisë, Damir Habijan, dhe autoriteteve kompetente, Ministrja Gërvalla ka kërkuar lirimin e menjëhershëm të shtetasit të Kosovës, duke ngritur njëkohësisht edhe shqetësimin lidhur me përdorimin e urdhër-arresteve të Serbisë ndaj qytetarëve të Republikës së Kosovës”, thuhet në njoftim.
Rasti, sipas ministrisë, është diskutuar edhe gjatë një bisede telefonike ndërmjet Gërvallës dhe ministrit kroat të Drejtësisë.
“Çështja është adresuar me qëndrimin se qytetarët e Republikës së Kosovës nuk mund të mbahen peng nga pretendime të tilla të Serbisë dhe se, për çështjet që lidhen me veprat e pretenduara të kryera në territorin e Kosovës, kompetenca u takon institucioneve të drejtësisë së Republikës së Kosovës. Ky rast është një tjetër dëshmi se qytetarët e Republikës së Kosovës nuk do të mbeten vetëm përballë përpjekjeve të Serbisë për t’i ndjekur dhe ndaluar përmes mekanizmave ndërkombëtarë”, theksohet në njoftim.
Në fund të njoftimit, ministria ka theksuar se institucionet e Kosovës do të vazhdojnë të angazhohen për mbrojtjen e të drejtave të qytetarëve të saj dhe e ka kundërshtuar atë që e ka cilësuar si përdorim politik të mekanizmave të drejtësisë.
“Askush nuk mund ta përdorë drejtësinë si instrument politik kundër qytetarëve të Republikës së Kosovës”./teve1.info/
