Autore: Adea Mustafaj
Familja e Isni Kilaj në Lubizhdë të Malishevës mbrëmjen e së mërkurës pati mysafirë.
Arsyeja ishte kthimi i ish komandantit të Ushtrisë Çlirimtare të Kosovës, Isni Kilaj në shtëpi.
Familjarë të afërt kishin ardhur të çmalleshin me ish kryetarin e Malishevës, të cilin e liroi Gjykata Speciale me kusht.
Kilaj, akuzohet nga Gjykata në Hagë për çështjen “pengimi i drejtësisë” bashkë me Hashim Thaçin, Bashkim Smakajn, Fadil Fazliun dhe Hajredin Kuqin.
I lumtur me kthimin e të atit ishte edhe i biri, Blendi.
“Ka qenë një lajm që e kemi prit shumë gjatë, na u ka ndreq jeta, jena gëzuar shumë, por njëkohësisht shpresojmë që drejtësia të triumfoj në fund. Babi është liruar me kusht, me masa të rrepta sigurie për të cilat nuk kemi shumë drejt të deklarohemi apo t’i shfaqim ato në publik, por ajo çka është më shqetësuese është se dëshirojmë që gjithë çlirimtarët të vijnë në Kosovë dhe atëherë Kosova do të jetë në rrugën e saj të drejt”, tha ai.
Kilaj për Tëvë1 ka treguar, se me çfarë kushtesh është liruar babai i tij.
“Sigurisht avokati çdo dy muaj ka bërë kërkesën e tij që të lirohet babi me kusht, pasi nuk ka asnjë fakt ose diçka që mund ta mbaj atë të burgosur atje. Lirimin e tij e kemi marr vesh pak ditë, mirëpo nuk e kemi ditë saktë ditën se kur do të mbërrijë në Kosovë”, tha djali i Isni Kilaj.
Por, gëzimi i Kilaj nuk ishte i plotë, pasi ai ka lanë shokët në Hagë.
“Po shpresoj që do të rrimë tash shumë gjatë dhe s’do të kthehet asnjëherë më atje. Dhe shpresoj që çlirimtarët atje të vinë të na bashkëngjiten. Po e ceki për arsyen se një ndër fjalët e para të tij ishte se i ka lënë ‘shokët vetë atje dhe është mërzit pak për ta’”, tha Kilaj.
Detaje, për lirimin e Kilaj, ka dhënë edhe vet Gjykata Speciale.
Sipas këtij organi, gjykatësi ka konstatuar se nuk ka rrezik që z. Kilaj të arratiset bazuar në periudhën e lirimit të tij të mëparshëm dhe shumën e ofruar të konsiderueshme si dorëzani financiare që do të humbiste.
“Gjykatësi konstatoi se rrethanat kishin ndryshuar që prej rishikimit të paraburgimit të z. Kilaj në tetor 2025 dhe se mbajtja e tij në paraburgim nuk ishte më as e arsyeshme, as proporcionale. Megjithëse Gjykatësi konstatoi se ekzistonte njëfarë rreziku që në qoftë se lirohet, z. Kilaj mund të pengojë ecurinë e procesit ose të kryejë vepra penale të tjera, ai arriti në përfundimin se në rrethanat konkrete e drejta themelore e z. Kilaj për liri peshon më shumë se këto rreziqe”, njoftoi Specialja.
Ky vendim ka gëzuar edhe Organizatat e dala nga lufta.
OVL-UCK ka shkruar qe për ta, ky zhvillim përbën një hap drejt reflektimit të domosdoshëm nga ana e kësaj gjykate.
Edhe ish komandanti, Fatmir Limaj ka reaguar duke e quajtur lajmin e madh dhe theksuar se shpreson që lajmet e mira nga Haga të vazhdojnë dhe të kulmojnë me fitoren e drejtësisë dhe lirimin e të gjithë bashkëluftëtarëve.
