Këtë e ka bërë të ditur kryetari i Partisë Demokratike të Kosovës, Memli Krasniqi, i cili tha se Miloti u lirua, por në të vërtetë sipas tij, do të duhej të arrestohej vetë ambasadori Berishaj.
“Para pak çastesh është liruar aktivisti ynë, Milot Krasniqi, i cili sot u arrestua pa të drejtë dhe në mënyrë arbitrare, gjatë protesës së tij ndaj Ambasadorit Martin Berishaj. Miloti tashmë është liruar, por ai që në të vërtetë do të duhej të arrestohej sot është vetë Ambasadori Berishaj, për aferën e dyshimtë korruptive dhe për dëmin e madh që i ka shkaktuar imazhit të Kosovës”, ka shkruar Krasniqi në një postim në Facebook.
Sipas tij, Berishaj dhe Kurti si bashkëpunëtor i tij nuk mund të sillen sikur s’ka ndodhur asgjë.
“Ai dhe Kryeministri Kurti, bashkëpunëtori dhe mbrojtësi i tij, nuk mund të sillen sikur nuk ka ndodhur asgjë, duke marrë pjesë nëpër aktivitete publike. Janë miliona euro që Ambasadori Berishaj i ka marrë nga kompania GEN-I me seli në Beograd, disa kallëzime penale të ngritura e dhjetëra raportime të mediave ndërkombëtare për aferën skandaloze, që kërkojnë sjelljen e tij para drejtësisë”, tha më tej Krasniqi.
Ai shton se nuk do të ndalen deri në zbardhjen e plotë të aferës së Berishajt.
“I vetmi vend ku Martin Berishaj do të duhej të fliste është para organeve të drejtësisë, e jo nëpër konferenca. Për të vërtetën dhe llogaridhënien e plotë të kësaj afere nuk do të ndalemi deri në zbardhjen e plotë të saj!”, përfundoi kreu i PDK-së, Memli Krasniqi. /Teve1.info/
https://teve1.info/lajmet/aksioni-ndaj-martin-berishajt-pdk-se-i-arrestohet-nje-aktivist/
