Platforma “Liria ka emër” nga 15 shtatori do t’i zhvendosë aktivitetet e saj në Hagë, ku së bashku me diasporën shqiptare do të organizojë aktivitetin “Nata e Pritjes”, në prag të shpalljes së vendimit përfundimtar për ish-krerët e Ushtrisë Çlirimtare të Kosovës.
Përfaqësuesja e platformës, Eliza Hoxha, në konferencën e fundit për media në Prishtinë, ka falënderuar qytetarët e Kosovës për pjesëmarrjen masive në “Marshin për Liri”, të mbajtur në mbështetje të Hashim Thaçit, Kadri Veselit, Jakup Krasniqit dhe Rexhep Selimit, të cilët ndodhen në Hagë.
Hoxha e ka cilësuar marshin si një aktivitet dinjitoz dhe madhështor, duke thënë se mesazhi i tij ishte i qartë.
“Mesazhi ishte i qartë, si në fotografi ashtu edhe në përmbajtje: Populli i Kosovës i shpalli çlirimtarët plotësisht të pafajshëm”, ka deklaruar Hoxha.
Ajo ka shprehur mirënjohje për organet e sigurisë për bashkëpunimin, si dhe për kompanitë dhe të gjithë kontribuuesit që ndihmuan në organizimin e marshit.
Duke folur për aktivitetet e zhvilluara para marshit të 12 shtatorit, Hoxha ka falënderuar komunat për organizimin e “Orëve të Pritjes”, si dhe qytetarët e organizatat që i kanë organizuar ato në mënyrë vullnetare.
Mirënjohje të veçantë, ajo ka shprehur edhe për organizatat e dala nga lufta dhe veteranët e UÇK-së për aktivitetet e përbashkëta në shtatë Zonat Operative, të zhvilluara nën siglën “Zjarret e Lirisë”.
Platforma “Liria ka emër” ka falënderuar gjithashtu bashkësitë fetare, grupet kulturore e sportive, komunitetet joshumicë, partitë politike dhe bizneset që kanë mbështetur në vazhdimësi marshin dhe aktivitetet e platformës.
Gjatë ditës së sotme, platforma ka marrë pjesë edhe në konferencën “Lufta për UÇK-në”, ku akademikë, përfaqësues të universiteteve dhe të shoqërisë civile kanë diskutuar për kujtesën kolektive, historiografinë, rrëfimet për luftën dhe riinterpretimet që kanë dalë nga proceset juridike.
“Nga data 15 shtator, platforma “Liria ka emër” zhvendos aktivitetet e saj në Hagë, ku së bashku me diasporën shqiptare do të organizojë aktivitetin “Nata e Pritjes”. Më 16 shtator, platforma pret vendimin përfundimtar për çlirimtarët dhe shpreh shpresën për një ditë feste për Kosovën”, thuhet në njoftim.
Në përmbyllje, Eliza Hoxha ka falënderuar mediat për bashkëpunimin dhe kontributin e tyre gjatë gjashtë viteve të veprimtarisë së platformës “Liria ka emër”.
“Faleminderit për bashkërrugëtimin dhe mbështetjen tuaj tash e gjashtë vjet”, ka përfunduar Hoxha./teve1.info/
