Në kuadër të shënimit të 18-vjetorit të shpalljes së Pavarësisë së Kosovës, platforma qytetare “Liria Ka Emër” organizoi një aktivitet simbolik në kryeqytet. Aktiviteti u realizua duke projektuar në fasadën e Presidencës së Kosovës një imazh me sloganin: “Dita e Pavarësisë – Ende duke mbrojtur lirinë tonë”.
Imazhi, që shfaq figurat e krerëve të UÇK-së, thekson mesazhin se mbrojtja e lirisë vazhdon edhe sot, 26 vjet pas çlirimit dhe 18 vjet pas shpalljes së pavarësisë.
Ismail Tasholli, një nga përfaqësuesit e platformës, tha: “Sot festojmë Pavarësinë, por njëkohësisht kujtojmë se liria jonë po mbrohet sërish. 26 vjet pas çlirimit dhe 18 vjet pas pavarësisë, çlirimtarët tanë, Hashim Thaçi, Kadri Veseli, Jakup Krasniqi dhe Rexhep Selimi, po përballen me drejtësinë në Hagë. Ne besojmë në drejtësi, por kërkojmë që ajo të jetë e paanshme dhe e drejtë”.
Sloganët dhe mesazhi i aktivitetit simbolizojnë bindjen se lufta çlirimtare ishte e drejtë dhe se mbrojtja e dinjitetit të saj është obligim qytetar dhe kombëtar. Aktiviteti synon të ruajë kujtesën historike dhe të nxisë përpjekjet për drejtësi të vërtetë.
Përveç këtij aktiviteti, në Prishtinë u organizua edhe një marshim masiv, i njohur si “Drejtësi, jo politikë”, ku mbi 130 mijë qytetarë mbushën sheshet e kryeqytetit, duke kërkuar një drejtësi të paanshme dhe duke mbrojtur dinjitetin e luftës çlirimtare. Ky marshim përshkoi rrugët e qytetit me një mesazh të qartë: kërkesë për drejtësi dhe mbrojtje të lirisë.
