Platforma “Liria ka Emër” ka reaguar pas miratimit të deklaratës nga deputetët e Kuvendit të Shqipërisë, e cila ka të bëjë me pafajësinë e ish-udhëheqësve të Ushtrisë Çlirimtare të Kosovës.
Në reagimin e saj, platforma ka shprehur mirënjohje ndaj institucioneve shqiptare për qëndrimin e marrë, duke e vlerësuar si një hap të rëndësishëm në mbështetje të asaj që e quan e vërteta historike e luftës së UÇK-së.
Sipas “Liria ka Emër”, deklarata përçon gatishmëri nga ana e Shqipërisë për t’u angazhuar në hapa diplomatikë dhe politikë në arenën ndërkombëtare, me synim që të mos cenohet narrativa mbi luftën çlirimtare dhe që drejtësia të zhvillohet në mënyrë të drejtë dhe të paanshme.
Në deklaratën e miratuar theksohet se UÇK-ja paraqitej si një lëvizje legjitime që mishëronte aspiratat e popullit të Kosovës për liri, dinjitet dhe vetëvendosje, në përputhje me parimet ndërkombëtare.
Po ashtu, nënvizohet se lufta e saj nuk mund të barazohet me krimet e kryera nga regjimi serb, ndërsa paralajmërohet për rrezikun e shtrembërimit të historisë.
Përmes këtij dokumenti, u bëhet thirrje Dhomave të Specializuara në Hagë, komunitetit ndërkombëtar dhe mekanizmave të drejtësisë që të sigurojnë një proces të rregullt dhe të paanshëm ndaj Hashim Thaçit, Kadri Veselit, Jakup Krasniqit dhe Rexhep Selimit.
