Kryetari i Nismës Socialdemokrate u është drejtuar qytetarëve të Kosovës, përkrahësve dhe bashkudhëtarëve politikë me një mesazh falënderues dhe reflektues në prag të ndërrimit të viteve.
Ai ka falënderuar nga zemra për çdo votë dhe për çdo mbështetje, duke theksuar se rruga e përbashkët nuk ka qenë e lehtë, por ka qenë e drejtë.
Sipas tij, vlera më e madhe e kësaj gare politike qëndron në faktin se përkrahësit kanë qëndruar drejt, me dinjitet dhe besim në atë që përfaqësojnë.
“Kjo garë u zhvillua në rrethana të veçanta dhe me një mobilizim të jashtëzakonshëm. Por përtej çdo shifre, ajo që mbetet është mbështetja juaj dhe bindja jonë se kjo rrugë ka kuptim dhe vazhdimësi”, ka theksuar ai.
Duke folur për vitin që vjen, Limaj ka nënvizuar se përpara i pret më shumë punë, organizim dhe përgjegjësi, si dhe një angazhim edhe më i madh drejt realizimit të qëllimeve politike.
Ai ka theksuar se Kosova mund të ecë përpara vetëm përmes bashkimit, pjekurisë dhe një vizioni të qartë për të ardhmen, duke shtuar se nuk ka asnjë arsye për të ulur kokën.
“Çdo votë është amanet. Çdo përkrahës është forcë. Ajo që kemi ndërtuar deri këtu nuk ndalet, por forcohet”, ka deklaruar ai.
Në fund, Limaj u ka uruar qytetarëve shëndet, paqe dhe mbarësi në familjet e tyre, duke uruar një Vit të Ri me shpresë, energji të re dhe besim në Kosovën.
“Ne vazhdojmë. Bashkë. Me vendosmëri. Gëzuar Vitin e Ri!”, ka përfunduar ai./teve1.info/
