Situata e sigurisë në vend mund të përkeqësohet së shpejti.
Kjo pasi që Serbia, vazhdimisht po bëhet gati për ngritje tensionesh.
Kështu thotë në një intervistë për Tëvë1, lideri i NISMA-së, Fatmir Limaj i cili tha se ka informacione për këto zhvillime.
Ai shton se një sulm i ngjashëm si Banjska, mund të ripërsëritet.
“Ka informacione që situata e sigurisë është duke ardhë dhe duke u përkeqësuar. Kurrë mos e harroni, kurrë ,kurrë, ne rrethohemi nga shtetet të cilat e mohojnë ekzistencën tonë, punojnë vazhdimisht me gjitha resurset e tyre që i kanë për ta çmontuar e penguar shtetndërtimin e Kosovës, një shtet normal kur ka në kufij shtet i cili publikisht angazhohet e mohon shtetin e Kosovës, dhe angazhohet që e kemi parë me veprime konkrete siç është Banjska, një shtet normal merr masa, e kujdeset vazhdimisht investon në sigurinë e vet”, tha Limaj.
E kjo sipas Limajt mund të parandalohet nëse institucionet marrin masa, ndërkaq akuzon partitë për komoditet në mos konstituim të Kuvendit.
“Ky komoditet, duke mos ia parë shqetësimeve dhe zhvillimeve që vijnë për mua është e habitshme. Kosovën e presin vendime të mëdha, nuk është mirë me na zënë vendime të mëdha për Kosovën, e Kosova mos me pas institucione mos me pas adresë. Ka me pas vendime të mëdha këtë vit, sidomos vjeshtën që vjen edhe probleme sigurie kemi. Për mua është e pashpjegueshme lehtësia e disave që kalkulojnë, për një votë më tepër për një deputet më shumë një më pak, janë të gatshëm edhe 6 muaj, 9 muaj me ia hup Kosovën pozicionin”, deklaroi ai.
I pyetur për marrëveshje eventuale me Lëvizjen Vetëvendosje, ai thotë se marrëveshja duhet të jetë një pako, jo e ndarë nga Kuvendi ose Qeveria.
“Marrëveshjet politike janë Kuvend dhe Qeveri, nuk ka marrëveshje politike për një pjesë e për një pjesë jo, cfarë domethën marrëveshje politike, ndërtohet partneriteti, ndërtohet një program, një marrëveshje ashtu siq ka ndodhur të kaluarën, dhe krijohet një shumicë parlamentare nuk thuhet një shumicë qeveritare, thuhet një shumicë parlamentare, e cila ajo reflektohet në parlament”, tha ai.
Sipas tij, NISMA që nga fillimi ka qenë unifikuese për të dalë nga situata e krijuar në Kuvendin e Kosovës.
“Ne si NISMË fuqia jonë politike është e kufizuar prej ditës së parë jemi munduar të jemi konstruktiv dhe të japim mundësia ne jemi aty për të kontribuar që forcat politike të arrijnë marrëveshje politike. Me ne është e pamjaftueshme ne jemi dhe duam të jemi të gatshëm që sjellim këtë marrëveshje politike që i shërben Kosovës”, tha Limaj.
Limaj shtoi se vendit i duhet sa më parë të formoi institucionet, duke lënë anash inatet politike.
