Kreu i Nismës Socialdemokrate, Fatmir Limaj, ka shprehur interesimin për t’u përfshirë në listën zgjedhore të Partisë Demokratike të Kosovës, ndërsa brenda kësaj partie ende nuk është marrë një vendim përfundimtar për këtë çështje.
Brenda PDK-së, disa anëtarë të kryesisë dhe ish-deputetë janë deklaruar në mbështetje të rikthimit të Limajt në parti, duke e parë si një figurë me kontribut në zhvillimet politike të vendit.
Lidhur me këtë çështje është deklaruar edhe kryetari i Drenasit, Ramiz Lladrovci, i cili ka thënë se PDK duhet të jetë e hapur për të gjithë ata që kanë kontribuar në lirinë dhe ndërtimin e Kosovës.
Sipas tij, jo vetëm Limaj, por çdo veprimtar që mbështet orientimin euro-atlantik të vendit dhe integrimin në NATO e BE, duhet të jetë pjesë e PDK-së.
Ramiz Lladrovci theksoi gjithashtu se PDK ka rol të rëndësishëm në proceset shtetformuese dhe se, sipas tij, të gjithë ata që ndajnë këtë vizion janë të mirëseardhur në parti.
