Kryetari i Nisma Socialdemokrate, Fatmir Limaj, tha se është në angazhime të përditshme për të gjetur një zgjidhje për ngërçin në Kuvend.
Ai tha se kjo situatë duhet të marrë fund sa më shpejt, derisa e quajti të domosdoshme arritjen e një marrëveshjeje politike.
“Sa më shpejt të marrë fund kjo situatë. Jemi në angazhime të përditshme për të gjetur zgjidhje dhe shpresoj që ajo do të arrihet. Pas konsumimit të interpretimeve të shumëllojshme të aktgjykimit të Kushtetueses, njerëzit e kanë parë se kjo çështje është ashtu siç ka qenë prej fillimit. Zgjidhja është politike, përmes marrëveshjes – dhe kjo po shihet e kuptohet”, tha ai.
Duke folur për rastin e 27-vjeçarit Agon Fejzullahu në Lipjan, i cili vdiq mëngjesin e së hënës pak pas arrestimit nga zyrtarë policorë të Kosovës, Limaj kërkoi përgjegjësi në hierarkinë e Policisë së Kosovës.
“Policia e shtetit është për t’i mbrojtur qytetarët. Policia e shtetit duhet të sillet me ligj. Policia e shtetit, edhe ndaj atij që është në kundërshtim me ligjin, duhet të veprojë sipas ligjit. Unë pres përgjegjësi nga kreu lart deri te poshtë. Ndoshta duhet të shikohet sesi është gjendja në Policinë e Kosovës”, tha ai
