Kryetari i Nismës Socialdemokrate, Fatmir Limaj, ka uruar Ditën e Çlirimit të Kosovës, duke thënë se 12 Qershori rikthen në kujtesë sakrificën e madhe të popullit, guximin e luftëtarëve të Ushtrisë Çlirimtare të Kosovës dhe realizimin e ëndrrës për liri.
Përmes një postimi në rrjetin social Facebook, Limaj ka kujtuar të gjithë ata që dhanë jetën për lirinë e vendit, duke theksuar se respekti dhe mirënjohja për ta mbeten të përhershme.
“Sot, me krenari në zemër dhe me mirënjohje të pafund, kujtojmë ditën kur Kosova mori frymën e lirisë. 12 Qershori është dita që na rikthen në kujtesë sakrificën e madhe të popullit tonë, guximin e luftëtarëve të Ushtrisë Çlirimtare të Kosovës dhe ëndrrën për liri që u bë realitet”, ka shkruar Limaj.
Ai ka përkujtuar edhe komandantin legjendar Adem Jashari, dëshmorët, martirët dhe të gjithë luftëtarët e UÇK-së, duke theksuar sakrificën e tyre për lirinë e Kosovës.
Limaj ka shprehur mirënjohje edhe për Shtetet e Bashkuara të Amerikës, NATO-n dhe aleatët ndërkombëtarë që, sipas tij, qëndruan pranë Kosovës në momentet më të vështira.
“Në këtë ditë të shenjtë për kombin tonë, shprehim mirënjohjen më të thellë për Shtetet e Bashkuara të Amerikës, NATO-n dhe të gjithë aleatët që qëndruan pranë Kosovës në ditët më të vështira”, ka shtuar ai./teve1.info/
