Ligji për Vlerat e Luftës Çlirimtare të Kosovës pritet të procedohet javën e ardhshme për miratim në Qeveri, ka bërë të ditur ministri për Punë, Familje dhe Vlerat e Luftës Çlirimtare, Andin Hoti, gjatë seancës së së premtes në Kuvend.
Sipas tij, procesi i hartimit tashmë ka nisur dhe aktualisht po përgatitet koncept-dokumenti që do të përfshijë të gjitha elementet kryesore të ligjit.
“Ligji për vlerat e luftës çlirimtare ka filluar në ministrinë time. Jemi në fazën e hartimit të koncept-dokumentit, i cili është afër finalizimit. Besoj që javën e ardhshme do të procedohet në mbledhjen e Qeveria e Kosovës për miratim, e më pas do të vazhdohet me procedurat e tjera”, deklaroi Hoti.
Nga ana tjetër, Organizata e Veteranëve të Luftës së UÇK-së (OVL-UÇK) ka kërkuar që ligji të reflektojë plotësisht kërkesat e tyre dhe të mos mbetet vetëm në nivel simbolik.
Në reagimin e saj, kjo organizatë theksoi se procesi duhet të prodhojë përmbajtje konkrete dhe të mbrojë vlerat e luftës, duke garantuar trajtim dhe njohje dinjitoze për të gjitha kategoritë pjesëmarrëse.
