Dy ligjet me përmbajtjen më të kontestuar dhe të kritikuar nga vendorët dhe ndërkombëtarët, morën miratimin e kuvendarëve.
Ligji për Këshillin Prokurorial dhe ligji për Komisionin e Pavarur të Mediave, morën votat e mjaftueshme nga deputetët e pushtetit.
Me ligjin për KPM-në, vlerësohet se pushteti po synon ndërhyrje në punët e medias, gjë që po shihet si e papranueshme.
“Kjo qeveri ka propozuar që numri i anëtarëve të KPM-së të rritet nga shtatë sa janë aktualisht në njëmbëdhjetë, dhe është e qartë që tendenca është për të dërguar njerëz të partisë në pushtet që të marrin vendime në favor të Vetëvendosjes. Dhe vet propozimi që kryetari i KPM-së të zgjidhet nga Kuvendi dhe jo nga anëtarët e tjerë të KPM-së është një tendencë e qartë. Ajo çfarë fatkeqësisht kemi parë është një qasje armiqësore e qeverisë edhe në deklarata publike kundër mediave, frymë e cila është bartur edhe në ligjin për KPM-në”, tha kryetari i AGK-së, Xhemajl Rexha.
Përmbajtja e ligjit, konsiderohet me një numër çështjesh problematike.
“Ligji për Komisionin e Pavarur të Mediave është antikushtetues, antievropian dhe antigra. Ligji ka shumë problematika, duke filluar nga mediat online, përfshirja e mediave online përmes një defincioni që nuk ekziston, e deri tek përbërja e komisonit”, tha Flutura Kusari, juriste e medias.
E ligji për KPK-në, që njëherë veçse ishte rrëzuar nga Gjykata Kushtetuese, vlerësohet se ka adresuar disa nga çështjet e kontestuara.
“Bazuar edhe në rekomandimet e Komisionit të Venecias dhe në vlerësimin e parë të Gjykatës Kushtetuese, ne vlerësojmë se projektligji ka adresuar shumicën e çështjeve që kanë qenë problematike, siç është përbërja e KPK-së. Pra, siç rekomandon edhe Komisioni i Venecias, ajo duhet të jetë një përbërje e pranueshme prej së paku shtatë anëtarëve”, tha Vullnet Bugaqku nga KDI.
Megjithatë, për këto dy ligje, opozita paralajmëroi se do t’i dërgojë në Gjykatë Kushtetuese.