Liga Unike e basketbollit në konkurrencën e femrave, do të vazhdoj me ndeshjet e xhiros së 7-të, të cilat do të zhvillohen të martën. Tri ndeshjet e kësaj xhiroje do të startojnë në orën 17:00, ku dy prej tyre zhvillohen në Kosovë dhe një tjetër në Shqipëri.
Bashkimi i Prizrenit që edhe është lider do të përballet me kampionin në fuqi të Ligës Unike, Partizanin e Tiranës. Kjo ndeshje luhet në palestrën “Sezai Surroi” në Prizren, ndërsa Bashkimi llogaritet favorit përball Partizanit. Aktualisht, Bashkimi është ekipi i vetëm këtë edicion që ende nuk di për humbje pas gjashtë xhirove të para. Prinë në tabelë me 12 pikë, pesë më shumë se Partizani që renditet i fundit dhe ka vetëm një fitore këtë edicion.
Dueli tjetër që luhet në Kosovë, është ai ndërmjet Penzës së Pejës dhe Prishtinës. Kjo ndeshje luhet në kryeqytet për shkak se semafori në palestrën “Karagaçi” në Pejë ende nuk është rregulluar. Prishtina ka pesë fitore deri më tani dhe zë vendin e dytë në tabelë me 11 pikë të mbledhura, ndërsa Penza është e treta me tetë pikë.
Ndërkohë, në kryeqytetin e Shqipërisë, skuadra e Tiranës e pret Flamurtarin e Vlorës. Të dyja ekipet kanë tubuar nga tetë pikë pas gjashtë ndeshjeve të luajtura dhe ndajnë pozitat katër dhe pesë në tabelë. Deri në fund të stinorit të rregullt të Ligës Unike për femra kanë mbetur edhe tri xhiro, përpara se katër skuadrat e para do të luajnë në garat e plejofit.
Ky është edicioni i tretë i Ligës Unike për basketbolliste.
