Për skuadrat e Ligës së Parë nuk do të ketë fare pushim, pasi xhiroja e radhës do të luhet këtë mesajvë, ka njoftuar Federata e Futbollit të Kosovës (FFK), të hënën.
Të gjitha, nëntë ndeshjet e xhiros së tretë të kësaj kategorie do të zhvillohen të mërkurën dhe atë prej orës 16:30.
Do të ketë përballje interesante, por dy prej tyre, që luhen në Mitrovicë dhe Suharekë, pritet të jenë derbi të kësaj xhiroje.
Në Mitrovicë, do të përballen Trepça dhe Trepça ’89, skuadra këto që kanë startuar mirë dhe synojnë rikthimin në Superligë.
Për dallim prej Trepçës ’89 që ka tubuar 4 pikë pas dy ndeshjeve të luajtura, Trepça ka pikë maksimale – 6, dhe dueli ndërmjet tyre do të jetë tejet interesant.
Ndërkohë, ndeshja tjetër është ajo ndërmjet Suharekës dhe Vushtrrisë, skuadra që pas dy ndeshjeve kanë tubuar tri, përkatësisht katër pikë.
Duelet tjera të xhiros së tretë, janë: Ramiz Sadiku – Prizreni, Vëllaznimi – Istogu, Besa – 2 Korriku, Kika – Feronikeli ’74, Rilindja – Vjosa, Liria – Tefik Çanga dhe Dinamo – KEK-u.
