Udhëheqësi Suprem i Iranit, Ajatollah Ali Khamenei, ka paralajmëruar të martën se anijet luftarake amerikane në Gjirin Persik “mund të fundosen në fund të detit”.
“Ushtria më e fortë në botë mund të marrë një shuplakë nga e cila nuk mund të shërohet”, tha Khamenei në një aktivitet në Teheran, duke iu referuar pretendimit të Presidentit të SHBA-së Donald Trump se Uashingtoni ka “ushtrinë më të fortë” në botë.
“Ata vazhdojnë të thonë se ne dërguam një anije lufte drejt Iranit. Shumë mirë, një anije lufte është me të vërtetë një mjet i rrezikshëm, por më e rrezikshme se një anije lufte është arma që mund ta fundosë atë në fund të detit”, shtoi ai, citon Anadolu.
Komentet e Khameneit pasuan kërcënimet e fundit nga Trump kundër Teheranit dhe forcimin e ushtrisë amerikane në rajon mes tensioneve të larta.
Të premten, Trump tha se anija luftarake USS Gerald R. Ford, e përshkruar si aeroplanmbajtësja më e madhe në botë, do të niset së shpejti drejt rajonit nëse bisedimet midis Uashingtonit dhe Teheranit dështojnë.
“Në rast se nuk arrijmë një marrëveshje, do të na duhet”, tha ai. “Do të niset shumë shpejt.”
Anija luftarake USS Abraham Lincoln dhe një flotë shkatërruesish janë tashmë të stacionuar në Gjirin Persik, pasi u dërguan muajin e kaluar mes tensioneve në rritje midis dy vendeve.
