Pas sulmit terrorist me 24 shtator në Banjskë të Zveçanit situata e sigurisë mbetet e ndjeshme në Kosovë.
Madje kryeministri i vendit Albin Kurti, ka deklaruar se shteti serb do ta përsëris krimin nëse nuk ndëshkohet nga komuniteti ndërkombëtar.
E pavarësisht situatës së krijuar, krerët shtetëror e kanë lëshuar Kosovën në të njëjtën kohë.
Zyra e Kryeministrit ka njoftuar se shefi i ekzekutivit kosovar ka udhëtuar për në Britani.
“Kryeministri i Republikës së Kosovës, Albin Kurti ka udhëtuar për në Mbretërinë e Bashkuar ku do të marrë pjesë në Konferencën Vjetore të Partisë Laburiste, e cila mbahet në Liverpool.
Përgjatë punimeve të kësaj konference, krahas fjalimeve, ai do zhvillojë takime me përfaqësues të lartë të kësaj partie si dhe përfaqësues të partive simotra nga shtete të ndryshme, që do të marrin pjesë në konferencë”, është thënë nga Zyra e Kryeminsitrit.
Kurse, Presidentja e vendit, Vjosa Osmani, ka udhëtuar në Kroaci për të zhvilluar takim zyrtar me homologun e saj kroat, Zoran Milanoviq.
“Presidentja e Republikës së Kosovës Vjosa Osmani, me ftesë të presidentit Zoran Milanović ka udhëtuar për vizitë zyrtare në Kroaci ku fokus i diskutimeve do të jetë thellimi i mëtejmë i raporteve bilaterale dhe zhvillimet e fundit në vend dhe rajon”, kanë deklaruar nga Presidenca e vendit.
Në Kosovë nuk është as Kryetari i Kuvendit, Glauk Konjufca.
Burimet e televizionit kanë mësuar se kryeparlamentari Konjufca po qëndron në Gjermani për vizitë zyrtare.
E lëshimi i vendit në të njëjtën kohë nga të tre liderët përbën shkelje serioze të Ligjit për protokollin e shtetit.
“4. Protokolli i Shtetit vihet ne dijeni paraprakisht për çdo lëvizje të personaliteteve kryesore, Presidentit, Kryetarit të Kuvendit dhe Kryeministrit jashtë shtetit. Vizitat bashkërendohen në mënyrë që të mos jenë të tre njëkohësisht jashtë vendit”, përcaktohet në Ligjin për Protokollin e shtetit të Republikës së Kosovës.
Protokolli i shtetit ishte shkelur edhe para 5 vitesh, kur në atë botë ish-presidenti i Republikës së Kosovës, Hashim Thaçi, ish-kryetari i Kuvendit, Kadri Veseli dhe ish-kryeministri, Ramush Haradinaj, kishin udhëtuar për në Bruksel për t’u takuar me ish përfaqësuesen e lartë të Bashkimit Evropian, Federica Mogherini.