Nga presidenca është bërë e ditur se kryetarit të Partisë Demokratike të Kosovës, Memli Krasniqi, të Lidhjes Demokratike të Kosovës, Lumir Abdixhiku dhe atij të Aleancës për Ardhmërinë e Kosovës, Ramush Haradinaj i është dërguar emaili për pjesëmarrje.
Ndërkaq, në manifestim kanë marrë pjesë Osmani, kryeministri i Kosovës, Albin Kurti dhe kryeparlamentari, Glauk Konjufca.
Gjatë fjalës së saj, Osmani tha se gjatë këtij eksodi në vitin 1999, Serbia kishte synim që nën regjimin e Millosheviqit, të shfarosë popullin shqiptar.
Ajo deklaroi se shumë familje të tëra përjetuan dëbimin e dhunshëm vetëm pse ishin shqiptarë, teksa vendin ku ndodhi eksodi e quan “si vend që ishte shpresë që mbante njerëzit disa hapa larg nga ndjenjat e sigurisë”.
“Eksodi i përmasava biblike kishte vetëm një qëllim nga ana e Serbisë, shfarosjen e popullit shqiptar në Kosovë dhe spastrimin etnik të Kosovës nga regjimi i Millosheviqit. Ky vend është bërë sinonim i volvotës kosovare në të cilin familje të tëra përjetuan dëbimin e dhunshëm vetëm pse ishin shqiptarë. Ky vend ishte shpresë që mbante njerëzit disa hapa larg nga ndjenjat e sigurisë në tokën e shtetit fqinj, të Maqedonisë Veriore ku qëndruan një pjesë e refugjatëve kosovarë e tjerë u tretën në botë në pritje të lirisë së Kosovës”, tha Osmani.
Tutje, presidentja potencoi se shteti i Kosovës është projekti më i rëndësishëm i ndërtuar me sakrifica të mëdha, por edhe i politikës së jashtme amerikane e evropiane.
“Shteti i Kosovës është projekti më i rëndësishëm i yni i ndërtuar me sakrifica të mëdha por edhe projekti më i rëndësishëm i politikës së jashtme amerikane, evropiane dhe i gjithë atyre që u vunë krahë nesh lirisë e demokracisë. Sot jemi këtu jo për të mbetur peng të historisë por për ta kujtuar të kaluarën tonë të lavdishme për t’i kujtuar gratë e burrat e UÇK-së dhe gratë e burrat të aleancës veriatlantike që e bën të mundshme realizmin e ëndrrës shekullore për liri e shtet”, tha Osmani.
Po ashtu, e para e shtetit nuk la pa përmendur edhe sakrificën e familjes Jashari gjatë luftës së fundit si dhe përpjekjet e presidentit historik, Ibrahim Rugova në ndërtimin e shtetit të Kosovës.
“Jemi këtu për të shikuar përpara dhe për t’i kujtuar figurat emblematike të përpjekjes për liri e shtet ndërtim do ta kujtojmë përherë përpjekjen diplomatike të urtë e këmbëngulëse të presidentit historik Ibrahim Rugova. Do të jetojmë gjithnjë me kujtimin për heroizmin e komandantit legjendar me familje që u bënë gurthemel i lirisë sonë. Do të jetojmë me kujtimin e mbi 3 mijë dëshmorëve, 13 mijë civilëve të vrarë, afër 20 mijë gra e burra të dhunuar e mbi 1600 të zhdukur me dhunë, nuk do të rreshtim së kërkuari drejtësi për gratë e dhunuar për të zhdukurit sikurse për të gjitha viktimat civile’, shtoi ajo./teve1.info/
