Liderët e gjashtë vendeve të Ballkanit Perëndimor, përfshirë edhe ata evropianë, kanë bërë fotografi të përbashkët para fillimit të punimeve zyrtare të Samitit të Procesit të Berlinit në Londër.
Në mesin e liderëve është edhe kryeministri në detyrë i Kosovës Albin Kurti.
Më pas do të mbahen panelet e diskutimit mbi “Ambicien dhe vizionin strategjik” dhe “Rritja, migracioni dhe siguria”.
Në punimet e samitit marrin pjesë liderë nga gjashtë vendet e Ballkanit Perëndimor, qeveritë partnere të Procesit të Berlinit – Austria, Bullgaria, Kroacia, Franca, Gjermania, Greqia, Italia, Polonia, Sllovenia dhe Mbretëria e Bashkuar; përfaqësues të shoqërisë civile, rinisë dhe biznesit nga Ballkani Perëndimor; institucionet e BE-së – Komisioni Evropian (KE), Shërbimi Evropian i Veprimit të Jashtëm (EEAS) dhe Presidenca e Këshillit; institucionet financiare ndërkombëtare si dhe Organizatat rajonale.
Samitet e fundit të liderëve janë mbajtur në Berlin (2024 dhe 2022) dhe në Tiranë (2023).
Kujtojmë, Procesi i Berlinit është një iniciativë që synon rritjen e bashkëpunimit rajonal në Ballkanin Perëndimor dhe ndihmon integrimin e këtyre shteteve në Bashkimin Evropian. Ajo u lansua në gusht 2014, nga kancelarja gjermane Angela Merkel.
Procesi i Berlinit zhvillohet me mbështetjen e Komisionit Evropian, institucioneve financiare ndërkombëtare dhe shteteve anëtare të përfshira në këtë proces – Austria, Kroacia, Franca, Gjermania, Italia, Sllovenia dhe Mbretëria e Bashkuar.
Kjo iniciativë plotëson procesin institucional të integrimit në BE të vendeve individuale, bazuar në miratimin e acquis communautaire.
Krahas takimeve të zyrtarëve më të lartë qeveritarë, seria e Samiteve të Ballkanit Perëndimor, Procesi i Berlinit përfshin takimet e përfaqësuesve të organizatave rajonale të shoqërisë civile, organizatat rinore dhe shoqatat e biznesit.
Procesi i Berlinit filloi me Konferencën e Berlinit më 2014, e cila u pasua nga Samiti i Vjenës 2015, Samiti i Parisit 2016, Samiti i Triestes 2017, Samiti i Londrës 2018, Samiti i Poznanit 2019 dhe Samiti i Sofjes 2020.
Nisma përfshin gjashtë vende të Ballkanit Perëndimor që janë kandidatë për anëtarësim në BE, Shqipëria, Mali i Zi, Serbia, Maqedonia e Veriut dhe kandidatët potencialë Kosova, Bosnja dhe Hercegovina.
