Nga qershori, një numër i bizneseve në Kosovë paguajnë çmimin e energjisë me tarifa jo të rregulluara.
Për këtë, disa herë u protestua e u kërkua që të shtyhet vendimi për daljen në treg të lirë të energjisë.
Madje disa kompani kishin dorëzuar edhe padi në Gjykata.
Së fundmi, Oda Ekonomike kishte dorëzuar kallëzim penal në Gjykatën Supreme e cila edhe shfuqizoi dy nene të udhëzimit për liberalizimin e tregut të energjisë.
Por sipas ZRRE-së kjo nuk do të thotë edhe anulim i vendimit për daljen në treg të hapur.
Për këtë nga Oda Ekonomike e Kosovës thonë se me paditë që kanë dorëzuar do të detyrohen që bizneset të kalojnë me tarifa të rregulluara.
“Ende ZRRE nuk i ka kthyer, mirëpo tani me padi të reja do të detyrohet me u kthy në shërbyes universal për shkak se aktgjykimi Gjykatës Supreme është shumë i qartë dhe urdhëron ZRRE pasi bazën ligjore nuk e ki në rregull duhet me kriju bazën e re, për shkak se kalon përtej kompetencave, pasi ka krijuar edhe një pasiguri juridike dhe ekonomike”, tha Lulëzim Rafuna nga OEK.
Sipas kryetarit të kësaj Ode, Lulëzim Rafuna, bizneset do të kërkojnë që të rimbursohen për dëmin që u është shkaktuar përmes kallximeve penale.
Liberalizimi i tregut të energjisë ka sjellë edhe pasoja ekonomike.
Vendimi i ZRRE-së i ka detyruar bizneset me mbi 50 të punësuar ose me qarkullim vjetor mbi 10 milionë euro të kalojnë në tregun e hapur të energjisë.
