Një person është ndaluar nga Policia e Kosovës në fshatin Medvec të Lipjanit, pasi ishte vërejtur duke lëvizur nëpër rrugët e fshatit me një pushkë në krah.
Sipas Policisë, pas pranimit të informatës, njësitë policore kanë dalë menjëherë në vendin e ngjarjes, ku kanë identifikuar dhe shoqëruar të dyshuarin.
“Gjatë ndërhyrjes policore është konfiskuar një pushkë ajrore, si dhe 74 copë diabola”, thuhet në njoftimin e Policisë së Kosovës.
I dyshuari është intervistuar në prezencë të avokatit mbrojtës, ndërsa pas konsultimit me Prokurorin kujdestar, rasti është iniciuar për veprën penale “Mbajtje në pronësi, kontroll ose posedim të paautorizuar të armës” dhe procedohet në procedurë të rregullt.
Policia ka bërë të ditur se hetimet lidhur me rastin janë në vazhdim.
