Lëvizja Vetëvendosje ka mbajtur mbrëmë mbledhjen e Kryesisë, ku janë diskutuar zhvillimet e fundit politike në vend, me theks të veçantë te procesi i zgjedhjes së presidentit.
Në njoftimin e saj, kjo parti thekson se situata aktuale rrezikon të çojë vendin në një proces të ri zgjedhor, i cili sipas tyre do të ishte i panevojshëm dhe me pasoja për stabilitetin institucional.
Vetëvendosje vlerëson se tashmë ka ndërmarrë disa hapa për të gjetur një zgjidhje, por thotë se propozimet e saj deri më tani janë refuzuar nga partitë opozitare.
Për të dalë nga ngërçi politik, Vetëvendosje ka propozuar një qasje të re, duke ftuar Partinë Demokratike të Kosovës (PDK) dhe Lidhjen Demokratike të Kosovës (LDK) që të propozojnë së bashku tre kandidatë për postin e presidentit.
Sipas këtij propozimi, kandidatët duhet të jenë figura unifikuese, me integritet të lartë dhe jashtë skenës aktuale politike. Për secilin prej tyre synohet të sigurohen të paktën 90 nënshkrime të deputetëve të Kuvendit të Kosovës.
Në rast se arrihet një marrëveshje e tillë, Vetëvendosje ka bërë të ditur se do të tërhiqte nga kandidatura emrat e propozuar më parë, përfshirë zëvendëskryeministrin dhe ministrin e Punëve të Jashtme dhe Diasporës, Glauk Konjufca, si dhe deputeten Fatmire Mulhaxha-Kollçaku.
Kjo parti u ka bërë thirrje subjekteve opozitare që të përgjigjen ndaj këtij propozimi deri të dielën në mbrëmje, duke theksuar se koha është e kufizuar për shkak të afateve kushtetuese.
Vetëvendosje apelon për angazhim të përbashkët politik në funksion të gjetjes së një zgjidhjeje, duke theksuar se kjo është përgjegjësi ndaj qytetarëve të Republikës së Kosovës./teve1.info/
