Sulmi në kanalin e ujit të Ibër-Lepencit, bëri që Serbia t’i dërgojë një notë verbale Këshillit të Evropës.
Në këtë letër, shteti serb thekson se distancohet nga sulmi i 29 nëntorit.
Ndërkaq pretendon se akuzat e Kosovës që drejtojnë gishtin e përgjegjësisë drejt Beogradit zyrtar janë të pabaza.
Megjithatë sipas analistit politik, Albinot Maloku, kjo është një letër shfajësimi nga ana e Serbisë.
Kjo, për të bërë faktorin destabilizues në lidhje me vullnetin e anëtarësimit të Kosovës në këtë mekanizëm ndërkombëtar.
“Letra vet që i është dërgu Këshillit të Europës kjo ka pasë tendencën edhe për të destabilizu angazhimin e Kosovës në anëtarësimin në KiE. Pjesa tjetër është që në të gjithë letrën e tij e cila është konsideru si notë verbale është lajmëruese që në një formë ose tjetër krejt thelbi është tek lobimi dhe kundërshtimi i gjithçkaje duke mos pranuar as subjektivitetin e Kosovës ku thotë se duhet të ofrojmë edhe ndihmën tonë”, shprehet Maloku.
Këtë letër e konsideron propagandë të Serbisë, analisti Dorajet Imeri.
“Është në kuadrin e propagandës që Serbia vazhdon ndaj Kosovës. Duhet të kujtojmë që ky është një veprim sabotazhi, synimi i së cilës është dëmtimi i kanaleve vitale të burimeve të energjisë për Kosovën. Dhe natyrisht që ky është akti ndër më të rrezikshmit me të cilin është përballë Kosova”, vlerëson Imeri.
