Një grup i gjerë artistësh, aktorësh dhe intelektualësh të njohur italianë i kanë bërë thirrje udhëheqësve të vendit të tyre që të mbrojnë Francesca Albanese, Raportuesen Speciale të OKB-së për Territoret e Pushtuara Palestineze, e cila është vënë nën sanksione nga Shtetet e Bashkuara për shkak të qëndrimeve të saj kritike ndaj Izraelit.
aNë një letër të hapur drejtuar Presidentit Sergio Mattarella, Kryeministres Giorgia Meloni dhe Ministrit të Jashtëm Antonio Tajani, afro 80 nënshkrues i kërkojnë qeverisë italiane që të ndërmarrë hapa të qartë në mbështetje të Albanese, e cila është shtetase italiane dhe, sipas tyre, po ndëshkohet për përmbushjen e mandatit të saj në kuadër të OKB-së.
Letra u nis nga Tlon, një projekt italian i përqendruar në përhapjen e kulturës, dhe kërkon heqjen e menjëhershme të sanksioneve amerikane ndaj Albanese.
Letra është nënshkruar nga figura të njohura të artit dhe kulturës italiane, përfshirë aktorët Pierfrancesco Favino, Paola Cortellesi, Stefano Accorsi, Valeria Golino, Luca Zingaretti, Valerio Mastandrea dhe Claudio Santamaria.
Ndër nënshkruesit janë edhe emra të njohur të skenës intelektuale si Serena Dandini, Lella Costa, Alessandro Bergonzoni, historiani i artit Tomaso Montanari dhe shkrimtarja Lidia Ravera.
Mbështetja për Albanese është bërë gjithnjë e më e dukshme edhe në publik. Një mural me mesazhin “Larg duart nga Francesca Albanese” është shfaqur në rrugët e Romës, si shenjë e solidaritetit ndaj saj.
Më herët, SHBA-të kishin kërkuar nga Sekretari i Përgjithshëm i OKB-së, Antonio Guterres, që ta shkarkonte atë nga detyra.
Misioni amerikan në OKB ka akuzuar Albanese për deklarata “anti-Izraelite” dhe “antisemite”, duke kërkuar ndëshkimin dhe largimin e saj. Sipas SHBA-ve, mosveprimi nga ana e OKB-së do të dëmtonte seriozisht kredibilitetin e saj dhe do t’i detyronte SHBA-të të ndërmerrnin veprime të njëanshme.
Në përgjigje, Komiteti i Procedurave Speciale të Këshillit të të Drejtave të Njeriut të OKB-së ka dënuar vendimin amerikan dhe ka shprehur mbështetjen e plotë për Albanese dhe mandatin e saj.
