Presidenti i entitetit Republika Serbe, Milorad Dodik, së bashku me anëtaren e Kryesisë së Bosnjës dhe Hercegovinës, Zeljka Cvijanoviq, po vazhdojnë të kundërshtojnë lëvizjen e lirë të kosovarëve me letërnjoftime.
Madje Mirolad Dodik, ka deklaruar se nuk do mbështesë asnjë marrëveshje nga procesi i Berlinit ndërmjet Kosovës dhe Bosnjës dhe Hercegovinës.
Diplomati britanik, Timothy Less, duke i komentuar këto zhvillime thotë se serbët e Bosnjës kanë pikëpamje të njëjta për Kosovën sikurse serbët e Serbisë, dhe si rrjedhojë kundërshtojnë pranimin e dokumenteve që vijnë nga Kosova.
“Serbët e Bosnjës refuzojnë të njohin pasaportat e Kosovës sepse nuk e pranojnë ekzistencën e Kosovës së pavarur. Sigurisht, Dodik u pajtua me deklaratën për lirinë e lëvizjes në Berlin vitin e kaluar, por kjo nuk do të thotë se ai e pranon atë në realitet. Në këtë aspekt, qëndrimi i serbëve të Bosnjës nuk është filozofikisht i ndryshëm nga ai i serbëve në Serbi, të cilët gjithashtu refuzojnë pavarësinë e Kosovës. Ajo që i dallon është vetëm se Serbia ka qenë nën presion të madh ndërkombëtar për të njohur dokumentet e udhëtimit kosovar, ndërsa Bosnja jo”, thotë ai.
Megjithatë, Less ka kritika edhe ndaj Kosovës.
Sipas tij diplomatët kosovar nuk kanë bërë përpjekje të mjaftueshme për të ndërtuar raporte më të mira me Bosnje dhe Hercegovinën.
“Fatkeqësisht për Kosovën, nuk shoh që diplomatët të shpenzojnë shumë energji në përpjekje për të ndryshuar pozicionin e serbëve të Bosnjës, sepse nuk ka nevojë urgjente për normalizimin e marrëdhënieve midis Bosnjës dhe Kosovës”, ka thënë diplomati britanik.
Kujtojmë që vitin e kaluar gjashtë vendet e Ballkanit Perëndimor nënshkruan në Berlin tri marrëveshjet e mobilitetit.
Ato parashikojnë lëvizjen e lirë të njerëzve me karta identiteti, njohjen e diplomave dhe kualifikimeve për tri profesione: mjekët, arkitektët dhe dentistët.
