Seancë e jashtëzakonshme u thirr të enjten në Kuvendin e Kosovës, për të shqyrtuar propozim-rezolutën për numrin e madh të kontratave njëburimore të nënshkruara gjatë mandatit të Qeverisë Kurti.
Lidhur me këtë çështje, deputeti i Lidhjes Demokratike të Kosovës, Besjan Mustafa, në një konferencë të thirrur për media, bëri një përmbledhje të shkurtër prej disa ministrive në periudhën 2021-2024, që sipas tij, janë tenderë me negocim të drejtpërdrejtë.
Në përmendje e sipër të ministrive, Mustafa përmendi Ministrinë e Ekonomisë, për të cilën tha se gjatë kësaj periudhe ka nënshkruar 151 kontrata njëburimore, në vlerë mbi 124 milionë euro, më e larta nga ministritë tjera.
“Të enjten kemi ftuar seancë të jashtëzakonshme, të zënë ngushtë dhe të paaftë për t’u ballafaquar me këtë temë dhe me faktet, ministrat dhe deputetët e Lëvizjes Vetëvendosje, lëshuan sallën. Po bëj një përmbledhje të shkurtër prej disa ministrive për këtë periudhë 2021-2024 të tenderëve me negocim të drejtpërdrejtë”, deklaroi Mustafa.
Më tej, Mustafa bëri përmbledhjen e disa ministrive, duke treguar numrin e kontratave të lidhura me negocim të drejtpërdrejtë, përfshirë edhe vlerën që kanë arritur:
- Në Ministrinë e Ekonomisë, duke përfshirë edhe ndërmarrjet publike që i raportojnë kësaj ministrie, për këtë periudhë kemi 151 kontrata të tilla, në vlerë mbi 124 milionë.
- Në Ministrinë e Punëve të Brendshme, për këtë periudhë kemi 33 kontrata të negociuara në katër sy, në vlerë mbi 25 milionë euro.
- Në Ministrinë e Infrastrukturës, kemi 69 kontrata të tilla, në vlerë mbi 10 milionë euro.
- Në Ministrinë e Kulturës Rinisë dhe Sportit, janë 56 kontrata të tilla, në vlerë mbi 4 milionë euro.
- Në Ministrinë e Drejtësisë, kemi 4 kontrata të tilla, në vlerë mbi 4 milionë euro.
Ndër të tjerash, deputeti i LDK-së, vlerësoi se në përgjithësi në nivelin qendror ka një trend të kontratave me negocim të drejtpërdrejtë./teve1.info/.
