Përmes një postimi në Faebook, LDK është shprehur se kanë kaluar 14 dit nga ky skandal dhe konkursi ende nuk është anuluar kurse të 4500 aplikuesit ende s’kanë gjetur drejtësinë, shkruan teve1.info.
“14 ditë nga skandali i punësimeve në KEK. Konkursi ende nuk është anuluar; të 4500 aplikuesit ende s’kanë gjetur drejtësinë; e pushteti s’ka marrë asnjë masë shkarkimi e suspendimi ndaj zyrtarëve të përfshirë në këtë krim”, thuhet në njoftimin e LDK-së.
Ndërkohë disa ditë më parë, Lidhja Demokratike e Kosovës ka ngritur kallëzim penal në Prokurorinë Themelore në Prishtinë, në lidhje me punësimet e fundit që janë bërë në (KEK).
Kjo Korporatë kishte shpallur konkurs për 150 vende të punës, në të cilin kishin aplikuar 4,668 kandidatë ku më 5 prill, nëpërmjet një komunikate për media KEK-u ka njoftuar se janë përzgjedhur kandidatët për 128 pozita, ndërsa 17 pozita nuk janë plotësuar.
Pas kësaj Prokuroria Themelore në Prishtinë ka konfirmuar se ka nisur hetimet në lidhje me punësimet e reja në KEK ,pas dyshimeve se në këtë konkurs janë punësuar familjarë të anëtarëve të Lëvizjes Vetëvendosje.
