Kryetari i Lidhjes Demokratike të Kosovës, Lumir Abdixhiku, ka deklaruar se LDK-ja ka përmbyllur të gjitha përgatitjet për nisjen e fushatës zgjedhore.
Në një takim të mbajtur në selinë qendrore të partisë me kryetarët e degëve dhe kryetarët e komunave që udhëhiqen nga LDK, ai theksoi se strukturat partiake janë të koordinuara dhe të motivuara për angazhim maksimal.
“Sonte u takuam me kryetarët e degëve dhe me kryetarët tanë të komunave në një takim pune të mbushur me energji dhe përkushtim. LDK është gati për fushatë, gati për mobilizim nacional. Me ekipet tona do të jemi në çdo qytet, fshat e lagje, me thirrjen se Kosova meriton qeverisje të drejtë dhe institucione funksionale”, u shpreh Abdixhiku.
Ai shtoi se partia do të hyjë në këtë garë e bashkuar dhe e përgatitur.
“Strukturat tona janë të lidhura e të vendosura ta çojnë këtë fushatë deri në fund, me punë dhe me rezultat. Ndjenja e gatishmërisë brenda LDK-së është e fortë dhe sinqerte. Secili e kupton peshën e momentit dhe nevojën që Kosova ka për stabilitet, zhvillim dhe shpresë”, ka shkruar ai.
Abdixhiku theksoi se LDK e ka nisur këtë proces si ekip dhe se kështu do ta përfundojë.
“E filluam si ekip, e vazhdojmë si ekip dhe do ta përmbyllim si ekip. Shpresa ekziston, zgjidheni atë”, përfundoi ai.
