Po bëhen gati katër orë që nga nisja e mbledhjes së “rrethit të ngushtë” të Lidhjes Demokratike të Kosovës, pas rezultatit të dobët të kësaj partie në zgjedhjet e 28 dhjetorit.
Mbledhja që ka filluar në ora 14:00 është duke vazhduar ende.
Pjesëmarrësit kanë sqaruar se nuk bëhet fjalë për mbledhje të Kryesisë, ndonëse në takim janë të pranishëm nënkryetarët dhe sekretari i përgjithshëm i LDK-së.
Asnjëri nga zyrtarët nuk ka konfirmuar nëse do të pranohej një dorëheqje eventuale e kryetarit të partisë, Lumir Abdixhiku, në rast se një gjë e tillë do të propozohej.
Sekretari i Përgjithshëm i LDK-së, Imri Ahmeti, tha se fokusi i takimit janë zhvillimet e brendshme, ndërsa paralajmëroi se pas përfundimit të mbledhjes do të ketë një deklarim për media. Ai nuk pranoi të përgjigjet nëse do ta mbështesnin një dorëheqje të mundshme të kryetarit.
